專業議政3名立法會議員莫乃光、梁繼昌同召集人郭榮鏗，噚日喺立法會同傳媒拜年後，破天荒同「特首」食晏撐枱腳！大家咪誤會佢哋同689 friend番，皆因呢位特首係署理特首，即係政務司司長張建宗。見係張建宗請，佢哋先至畀面去灣仔金紫荊開餐！
早排屋企焗爐爆炸嘅梁繼昌，特別用整番好嘅焗爐整cupcake畀記者食，開餐前事先聲明「啲蛋糕冇玻璃碎」，又笑指啲cupcake有凹有凸，同啲特首參選人一樣。
年初一已經撞親頭入院縫針嘅莫乃光則漏夜整齋菜，佢笑言希望今次意外替大家擋晒血光之災，話縫咗三針後，最擔心影響髮線生長，仲自爆今次俾樹枝撞親，係因為行路時掛住睇手機，結果撞到成頭血，年初一已咁好運，希望同大家一齊行大運！