「鐵甲奇俠飛行之旅」落戶香港迪士尼樂園成個月，唔少人都試過同Ironman一齊飛，但背後點運作就真係未必個個知。樂園上個禮拜首度安排傳媒參觀後台，原來鐵甲號真身係兩層樓高、16噸重嘅巨型飛行模擬艙，唔係普通4D影院咁簡單。
當遊客扣好安全帶，兩邊連接橋會喺兩秒內下降，電腦控制機艙最大搖擺幅度近20呎，營造逼真飛行效果。部機採用同民航機模擬艙同級嘅六自由度（6 degree of freedom）系統，6支電動桿控制前後、高低、搖擺等動作，比傳統油壓桿更精準。
樂園遊樂設施營運經理蘇紀禮話特別將冷氣控制喺18℃，冇咁易玩到暈，啟用前曾進行逾5,000次測試，確保運作安全。