近年保險公司好興搞健康獎勵計劃，好似友邦個Vitality健康程式計劃，客戶用智能運動裝置記錄每日行幾多步，達標就可以儲分換禮物，好似戲飛、保費回贈等，最近仲可以現金回贈畀客戶買3,000蚊嘅Apple Watch，咁你當然要買份保單先啦。
其實要達標都唔易，唔好話全額回贈，回贈1,500蚊先算，都要有2萬積分，即係閣下今年每個星期有5日、至少行7,500步，仲要得閒去做健康評估、買蔬菜咁儲分。如果要全額回贈，就要參加埋馬拉松、做身體檢查，都幾甘吓。
不過香港人搵著數又可以去到好盡嘅，計劃推出第一年，已經逼到班客仔係咁行，截至舊年7月已經總共行咗120億步，換咗超過2.5萬張免費戲飛。話說回來，唔知行得多，健康啲，係咪真係可以claim少啲保險呢？