美聯（1200）噚日舉行新春團拜，太子女副主席黃靜怡發表「買樓靠父幹」論，話做咗調查，發現香港四成年輕人買樓靠父母畀首期，相對內地七成年輕人靠父母畀首期，所以估計仲有上升空間喎！
睇番佢個調查，只不過透過電話訪問116個近5年首次置業嘅人，而內地七成上車客靠父幹，就引述國際顧問機構世邦魏理仕舊年底報告，訪問1,000個中國千禧一代。
孖屐口痕友一致認為，黃小姐呢種類比推論似乎唔多合理，調查訪問對象唔夠闊亦有欠公允。不過地產代理要做生意，當然係唱好，家陣樓價越推越高，年輕人根本好難儲到首期，唔靠父母，唔識投胎真係好難上到車㗎，唔使做調查都知道啦。