大家覺唔覺呢幾日假日氣氛依然強勁，唔少公司仲未啟市，擇好日子先至開工。好似康宏咁，佢哋噚日初六啟市，久未露面嘅康宏行政總裁（CEO）莊偉忠都有現身舞獅開市儀式，佢舊年忽然大病一場，見佢家陣龍精虎猛，雞年祝佢身體健康。
莊偉忠近期不時都喺自己facebook貼文貼相，話自己去跑步，不過多數見佢一支公。大家都知康宏一班高層最鍾意跑山、跑拉松，問主席王利民做乜唔搵埋莊偉忠去行山，王利民好型咁答：「我連老婆都唔叫，點會叫佢（莊偉忠）。」又打趣話「莊生要同林鄭行」（笑兩人本身都冇行開山）。
說到底，莊偉忠多年冇做運動，舊年又忽然心臟病發，只適宜做輕量運動，行山難啲，郊遊應該就得嘅。