曼聯喺上年12月起連贏九場氣勢如虹，領隊摩連奴嗰陣就春風得意，仲會同傳媒搞吓笑喺記招扮聽電話咁，不過紅魔最近勢頭滑落，近五場波只係喺英足盃贏過韋根，周三英超主場迎戰侯城踢成0:0和局失分，摩連奴啲黑面又返晒嚟，反轉豬肚賽後向傳媒出氣，鬧人唔識波就唔好揸咪。
落後車仔14分
曼聯最近喺英超連和三場，今場對住賽前仲係包尾嘅侯城仲衰到入唔到波，繼一星期前英聯盃四強次回合輸畀對方之後，今次喺英超又係贏唔到，今場派出伊巴謙莫域、米希達利恩同保羅普巴等強陣出擊，到下半場換入朗尼同桑馬達都係入唔到波，最終0:0和局收場。曼聯𠵱家落後榜首車路士14分，足智彩奪標賠率已冷到有50倍，都係叠埋心水爭前四。
摩連奴喺賽後接受訪問，被問及點睇場波，就相當之唔高興咁回應：「入唔到波就梗係贏唔到，對手個門將嘅表現亦相當之好，侯城基本上係全場死守，但作為一支護級分子，每一分都咁珍貴，咁樣踢亦無可厚非。如果你唔識波，就唔應該揸住呢支咪。」講完就氣沖沖走咗去，都幾冇品。
