曼城領隊哥迪奧拿一直信任哥迪奧巴禾，但可能新年求咗支籤，得到指引啦，哥帥終於醒覺，喺禮拜三英超收起巴禾，用韋利卡巴尼路正打選。後防即刻穩陣晒之餘，新援加比爾捷西斯仲交到功課，呢位巴西小將又入波又助攻，幫球隊作客以4:0大炒韋斯咸，成為呢輪唯一一支贏波嘅前10名球隊。
今年第一場清白之身
哥迪奧拿今季寵信巴禾，但呢位智利門將近期狀態低迷，對手射親中龍，巴禾都救唔到，簡直好似對手嘅黃大仙一樣，射中必入，有求必應！哥帥保咗巴禾幾場後似乎都承受唔住壓力，趁副選龍卡巴尼路喺英總盃踢得幾好，嚟到周三英超都繼續搵佢擔正，雪一雪巴禾先！真係咪話唔信邪，換一換個龍，曼城呢場作客韋斯咸就冇失到波，仲大勝4:0，係藍月今年第一場保持清白之身嘅英超。賽後哥迪奧拿都顧全巴禾面子：「我對兩個門將都好有信心，就好似我今場決定用卡巴尼路咁，可能第二日我就會決定用第個，例如巴禾。」
捷西斯擔正入波兼助攻
呢場曼城能夠大勝，除咗多得哥帥知錯能改肯換龍之外，仲要多謝上月加盟嘅巴西前鋒加比爾捷西斯。捷西斯今季英超首次正選，17分鐘就先助攻奇雲迪布尼開紀錄。21分鐘，曼城靠大衛施華建功，之後捷西斯喺完半場前拉開到3:0。下半場，耶耶托尼12碼埋齋，幫曼城鎖定作客以4:0大破韋斯咸。呢場曼城派22歲嘅史達寧、21歲嘅利萊辛尼同19歲嘅捷西斯打三叉戟，活力十足，賽後哥帥大讚呢個組合，「我哋嘅三叉戟平均年齡得20歲左右，我唔知有幾多豪門可以有一個咁後生嘅組合。捷西斯呢場係個鬥士，前場壓迫做得好好，用波亦有好智慧，仲有佢喺禁區有天生嘅門前觸覺。」捷西斯咁勇猛，哥迪奧拿梗係搵佢入歐聯大軍名單，加埋重獲重用嘅耶耶托尼一齊，準備嚟緊16強鬥摩納哥。
呢個周中嘅英超，由車路士到韋斯咸，賽前排前10名嘅球隊有九隊都失分，係得曼城贏波。雖然曼城家陣仲係排第五位，但已經追到同第四位嘅利物浦同樣得46分，差熱刺同阿仙奴一分。