成日話有今生，冇來世，大年初五嘅一場工商盃（33歲以上組別）決賽，就真係可以咁樣形容。對賽隊伍係維珍妮vs迪洋國際，其實可以話係90年代嘅南華對福建，稱得上是粒粒皆星，亦令比賽嘅石塘咀體育館，變得好似重建前嘅麥花臣咁樣，仲有不少球迷專程到場睇波。
先講陣容，紅衫迪洋由南青嘅謝志強做教練，翁金驊領軍，隊員包括李敬倫、宗銘達、梁國成、呂楚威等，至於白衫嘅維珍妮亦不遑多讓，譚偉洋做教練，隊員有胡國鋒、李偉倫、張錦州、李嘉耀及虞興海等，加上場邊打氣嘅宋方，唔講仲以為係九十年代港隊分隊練習㖭！
比賽一直咬得好緊，半場維珍妮就領先23:21兩分波咁多，下半場李偉倫就繼續發威，籃底轉身樣樣有，幫維珍妮維持優勢。去到比賽剩番三秒，「巨華」楊敏華博到罰球，兩罰中一，當時維珍妮成隊都好興奮，以為贏梗之際，點知無晒暫停嘅迪洋籃底開完波，一下長傳交俾出名「大心臟」嘅驊哥，只見離籃三十幾呎嘅佢轉身射個三分波，點知真係射入！球證亦即刻吹雞完場，成班紅衫軍自然興奮到癲晒啦！成日話勇士嘅居里（Stephen Curry）幾勁又幾十呎logo shot，今次驊哥呢下含金量，唔低得過咖喱仔㗎！
曾經贏過「亞洲三分王」嘅驊哥，今日接受我哋採訪時都好謙虛，自言生涯都試過三至五次「絕殺」，不過今次就真係有運：「因為當時都冇時間，真係憑感覺，亦都冇乜秘訣，只可以話同做人有鬥志同決心有關。」聽唔到驊哥話自己有大心臟，好似有啲失望囉。