最近不時陪葉劉四出拉票嘅新民黨立法會議員容海恩Eunice，新年當然被問及蜜運情況，佢噚日同傳媒聚會時被問幾時結婚，低調拍拖嘅佢話：「我呢啲好輕鬆、冇壓力嘅」，仲話冇人敢問佢幾時結婚㗎，「問咗咁多年，唔問㗎嘞！」
佢話幫葉劉拉票「唔算太痛苦」，主要向法律界、社福界等拜票，但由於身處黨「核心嘅外圍」，所以唔知葉劉仲差幾多票。有「西環契女」之稱嘅佢話西環冇打電話畀佢施壓，而若然西環真係打畀選委拉票，「咁就乞人憎囉！人哋有自己諗法㗎嘛！」
Eunice預告嚟緊會同葉劉去沙頭角接觸市民，因為嗰度屬於佢新東選區範圍。對於葉劉近日被網民惡搞性感圖，Eunice睇完都爆笑：「我諗激得滯，假嘅吓嘩？」但佢自爆識整呢種P圖噃。