新年流流其實都唔想睇咁多唔開心嘅新聞，不過小弟面書嘅朋友實在太多反中亂港分子，搞到周不時都睇到啲抹黑中華民族好兒女嘅新聞。話說大年初二浙江就有一個動物園，有一位男子唔想畀門票入場，結果就翻牆入園，好衰唔衰佢就爬入老虎區，結果就俾老虎咬死，事後事主太太就聲淚俱下控訴動物園冇好好管理，防止外人翻牆入園，睇個勢都係想頴賠償。
強國真係乜嘢千奇百怪嘅新聞都有，正所謂狗咬人唔係新聞，人咬狗先係新聞，中超球隊想買邊個邊個球星，已經唔係新聞，𠵱家係中超球隊外援多得滯，可以借番畀歐洲球會㖭，真係巴閉。好似上海申花上年12月買左競賽會嘅巴拉圭翼鋒奧斯卡羅美路，踢都未踢過就將佢借畀西甲嘅艾拉維斯；仲有拉科魯尼亞都要多謝強國黨，事關華夏幸福將前車路士新星卡古達，借畀拉科護級之用，真係豪。
講豪，申花先係最豪，因為簽咗泰維斯，外援爆晒額，就將丹巴巴亞（藍衫）借番去比錫達斯，仲支付埋佢餘下600萬歐元年薪嘅大部份㖭。丹巴巴亞算係大名氣球星闖中超嘅先驅，15年已經到申花搵食，不過正所謂食得鹹魚抵得渴，上年經過恐怖斷腳，救護車遲遲都入唔到場，又冇氧氣樽，等佢苦等十幾分鐘，就知道人仔唔易賺啦。嗱，以強國今時今日嘅霧霾、地溝油食物等等，大家又放長雙眼，睇吓奧斯卡杜斯山度士、韋素、泰維斯呢啲巨星，又踢到幾多季！
文：牽牛