莊曾呢位番書仔，宣佈參選後竟然識講休養生息，真正意思係過去幾年，香港社會分化，示威不絕，立法行政關係緊張，政改搞不成，弄出一個雨傘佔領運動，再轉化成為港獨思潮嘅起源，不少市民再度興起移民念頭。在如此情況下，政府不如與民休息，調和社會氣氛，恢復各方合作、團結。
莊曾用意雖好，但即刻成為梁特攻擊藉口，葉劉一早話莊曾hea足十年，林鄭在一些吹風場合暗諷財爺唔做嘢，愛國報章及梁粉更發文大力攻擊「休養生息論」，問題說明莊曾一句休養生息係擊中梁特林鄭（呢兩位忠實政治盟友治港理念相近）要害噃。
「休養生息」究竟係乜意思？翻查資料，呢四個字出自唐朝韓愈「平淮西碑」：「高宗中睿，休養生息」，休養即保養，生息指人口繁殖，泛指戰亂之後，朝廷要減低人民負擔，讓人民安居樂業，恢復元氣。再追查歷史，漢初有「文景之治」（舊時中學歷史科有教），漢高祖劉邦死後，惠帝即位，呂太后把持朝政，任用呂姓家人，政治局面混亂，要到呂后歸天，大臣周勃等擁立劉邦庶子代王劉恒為帝，是為文帝，始逐漸平定局面，四十年間，文帝之後而景帝，皆用黃老之學，主張「無為而治」，「與民休息」，具體內容係減稅（輕稅重賦），廢除苛法（連坐法，肉刑），丁男徭役（為政府做義工）由一年一次改為三年一次，將劉邦嘅十五稅一，改為三十稅一。文景二帝治下四十年，國庫充實，有銀兩太多而不用，串錢繩子完全腐爛，糧倉食米太多而變質，國民富裕，人口激增，史稱「文景之治」，後來漢武帝東征西討，揚名四海，皆拜文景二帝奠下國家富強基礎所致。從中國歷史觀之，「與民休息，無為而治」係一件大好事，梁振英林鄭月娥唔知點解，大肆攻擊莊曾休養生息論，睇嚟係唔熟書，不讀歷史。至於葉劉話莊曾hea，唔做嘢，相信係佢去完史丹福大學之後，相信西方經濟學之干預理論啫。現代經濟學理論有兩大流派，凱恩斯學說及其徒子徒孫衍生出來之需求管理、財政政策，市場平衡，政府適當干預等理論及海耶克/佛利民之自由市場，市場效率理論（泛稱芝加哥學派），香港財政司由郭伯偉（最hea之人？）至夏鼎基遺下嘅傳統就係不干預，積極不干預理論，愛講大市場，小政府，莊曾應係呢一派，因而被罵為唔做嘢，hea足十年。梁特林鄭係干預派，咪乘機攻擊莊曾係懶人一個囉，或者佢地不懂hea得有理論嘅根源啦。