譚耀文係第7屆新秀歌唱大賽金獎得主，但已經有20年冇唱廣東歌，最近為4月演出嘅《風雲5D音樂劇》再唱廣東歌《慾望面前》，日前佢喺中環接受專訪坦言：「呢個真係慾望，自己鍾意嘅唱歌同做戲擺埋一齊，覺得好親切。」咁多年冇唱有冇擔心唱功？佢笑話：「冇喎，有少少輕敵㖭。」阿譚為咗呢部音樂劇，推咗一部電影同一部內地劇，佢話：「20年先唱一次，梗係值得。」
「有白手興家感覺」
十多年前轉戰內地拍劇，捱咗咁多年嘅阿譚表示：「呢行好得意，今年係咁，明年可能唔係咁，冇永遠肯定感覺畀你，尤其我呢啲自由身，冇大公司支持。咁多年我賺到最珍貴嘅係家人，有幸福家庭，有白手興家感覺，太太照顧屋企好偉大，令我好放心工作。」喺內地有冇受過引誘？阿譚坦言：「自己有穩定感情冇諗呢啲嘢，其實我係一個幾悶嘅人，唔會風花雪月，做好工作一定有回報。」
問到有乜嘢實質回報？阿譚笑笑口話：「唔係好多，咪就係住緊嗰層樓，都有三、四個商廈舖位投資，做咗30年嘢有啲揸拿，𠵱家樓價癲到太離譜，我冇買樓好耐，諗到啲人冇樓住好慘。」鍾意香港定內地嘅生活？佢話：「香港因為媽咪喺度，仲有好多責任，一定係香港，工作就全世界都得，不過呢排唔敢拍古裝怕甩頭髮，已經冇乜喇，再冇埋就大鑊。」
撰文：馮仁昭