恭喜發財，各位開工大吉！
又嚟到一年一度組團洗樓𢱑利是嘅大日子，你哋鎖定公司嘅「鐵票」未？即係老細級，或者全世界都知結咗婚嗰啲，呢批利是你食硬佢哋！至於想話增加收入，搵出可能嘅「游離票」，即係表面上未結婚，其實暗啞底結咗嗰啲，就睇下你哋新年前有冇做足「風林火山」嘅準備！
「風林火山」四式包括早啲收風，臨新年前幾個月已經同目標混熟，金睛火眼睇下邊個無名指戴戒指，最後用刪除法，大膽假設，但凡適婚年齡都CHOK下佢哋結咗婚未！摸清同事個底，實行一封利是都不能少！
不過，正所謂「洗樓團」有張良計，「孤寒鐸」都有過牆梯，佢哋為咗守住個荷包，會同三唔識七都一齊洗樓嘅團友一樣咁厚臉皮，使出一招：扮晒魚蝦蟹！扮同另一半鬧離婚，扮唔識人，扮帶唔夠利是，扮唔知走咗去......逃避雖可恥但有用，保住一封得一封，只要夠膽做就會贏！
究竟「洗樓團」臉皮厚啲，定「孤寒鐸」扮晒蟹勁啲？即刻去片過招啦！
