工黨立法會議員張超雄喺議會內外為弱勢發聲嘅形象，深入民心，大家可能唔記得佢另一個身份，其實係大學講師。
查實張超雄由1997年起喺香港理工大學教書，現為應用社會科學系講師嘅佢，原來都教咗成20年書咯，今年佢就年屆60歲，即係話就嚟要退休喇！
張超雄噚日喺facebook公佈呢個消息，當然唔係想大家為佢搞惜別宴啦，而係佢個辦公室收埋咗好多藏書，所以專誠搞番個「退休前大清貨」嘅活動，將藏書免費贈送畀願意收留佢哋嘅有心人。
八方目測就發現，應該都有幾百本㗎，而且唔單止係教學書或者學術相關嘅書籍，就連《唐詩三百首》、季羨林嘅《牛棚雜憶》，以及英文字典等等都有。
張超雄甚至將佢啲藏書放喺辦公室外嘅走廊，貼張紙出嚟話歡迎大家自取。結果唔夠一日已經冇乜淨，佢都話估唔到大家反應咁熱烈，多謝各位幫襯。