曾經嘅妖人，如今嘅墮落，或者都唔可以叫墮落，比起小弟雞碎嘅人工，寂寂無聞，佢哋都仲喺天堂之上，只不過佢哋兌現唔到初出道嗰陣所展現嘅潛力。柏圖（右）年少成名，出道時係首屈一指嘅新星，但如今27歲嘅佢，已經去咗中超；保贊出道嗰陣係被視為巴塞隆拿繼美斯之後嘅耀眼新秀，但家陣史篤城都踢唔掂，借咗去德甲。
小弟讀中學嗰陣玩《football manager》都幾鍾意呢兩位球員，柏圖勝在速度快，而保贊就係少有把握力20（最高係20）嘅球員，嗰時都將佢哋練成世界級球員。轉眼咁多年，小弟大學都畢業埋，忙於為大家寫吓賭波，有兩年冇掂過《FM》，而柏圖同保贊就喺球壇越踢越沉。柏圖啱啱加盟AC米蘭嗰陣真係好快，令人覺得巴西同AC未來10年嘅領軍人物已經出現，點知佢踢咗三季左右好波之後，就因為受傷，再返唔到高𥧌，之後仲黯然離開紅黑軍。柏圖喺AC期間最令人記得嘅事迹係，搭上咗貝盧斯科尼個女芭芭拉，展開姊弟戀。喺柏圖沉淪後，小弟都聽過網民講笑話可能芭芭拉嗰陣吸乾咗柏圖喎。
講吓保贊啦！美斯出道嗰陣打破咗巴塞好多紀錄，但好快就被保贊打破，例如最年輕喺西甲上陣嘅巴塞球員。嗰陣外界都睇好保贊成才，成就分分鐘拍得住美斯，但佢最終無法喺巴塞立足。喺今季嘅史篤城，保贊連正選都冇，希望佢下半季喺緬恩斯會有多啲機會啦。
文：咖喱