白鴿黨立法會議員林卓廷趁年初五，邀約傳媒到佢屋企拜年，其間親自炮製最拿手嘅炆牛腩同滷水雞翼，食到大家停唔到口。
新年不停落區幫街坊寫揮春嘅阿廷話，最多人叫佢寫嘅係傳統揮春「身體健康」，但亦有人要求佢寫啲之前無練習過嘅特別願望，包括「CY坐監」、「林鄭墮馬」，同埋一男子要求寫畀老婆嘅「一世為奴」！
講起跑馬仔，阿廷就話，至今未諗掂提名邊個，而四名熱門建制派參選人中，佢話林鄭為官時經常黑面，所以對佢無乜好感。唔少人鍾意嘅胡官，佢亦唔多like，插胡官當年做截取通訊及監察事務專員時，令唔少犯下無心之失嘅廉署人員收警告信，搞到當時好多人劈炮唔撈，覺得胡官當年做法明顯「過咗火」。至於民望最高嘅薯片叔叔以及新民黨葉劉淑儀，阿廷就話無乜評價，但笑言為保長毛清譽，一定唔會提名佢選特首喎。