苟芸慧三年前因不堪壓力，令甲狀腺失調，導致體重不受控地暴脹，近日減肥成功，索爆回歸娛樂圈，瘦了兩個碼的她重拾自信，經歷過人生最低潮後，苟姑娘才發現原來自己好幸福，放下以往的執着，重新再出發。
統籌：林妙萍
撰文、造型：顏英儀
攝影：郭賢興
化妝：Emma
髮型：Sue Cheng of Hair Corner K11
於台灣出生，加拿大長大的苟芸慧，09年當選國際中華小姐冠軍入行，出道時有翻版林熙蕾的稱號，是不少男人心目中的女神。可是入行後負面新聞多多，緋聞不絕，同郭富城拍廣告就被傳介入郭富城和熊黛林的戀情，有感委屈，令身體不堪負荷終於在13年爆煲，消失於幕前養病。
靠做戲發洩
「之前我好努力工作，但個結果就唔係我想嗰回事，𠵱家知道有好多因素影響呢份工作，經已睇化咗，只要做好自己就得，有情緒可以透過做戲發洩出嚟，終於學識咗唔好將事情放大，好多事要經過先知道，原來自己好幸福。」若工作上再遇城城會否接？「唔係真嘅，所以唔使驚，大家都係朋友，同佢拍過一次廣告，佢仲教我邊啲位會拍得靚啲，教我好多嘢，個人又nice，係一個好好嘅前輩。」
性感無底線
回勇後的苟姑娘早前為男性雜誌拍攝了一輯噴血寫真，相片出街後，她IG的follower更爆升一倍到15萬人，「今次真係好surprise，冇諗過咁大feedback，自己學識咗要調節心態，唔好諗得太多，今次有出乎意料嘅結果。」放下從前的執着才會懂得活在當下，苟姑娘除了進修珠寶設計和演員課程之外，也計劃出文字相集，事先張揚是性感無底線。
工作mode再次啟動，感情似乎也有着落，早前苟姑娘被影到與馬來西亞錫礦大王陸佑後人陸漢洋（前名陸恭和）一起睇演唱會，又為男方慶祝生日，感情生活甜到漏，「我嘅感情生活同生活一樣都係好收埋嘅，當然生活中有人錫你，有需要時有個倚靠係開心嘅事，其實我嘅愛情觀好簡單，拍拖開始時要有刺激嘅感覺，但到最後係希望可以平平淡淡，另一半可以好似朋友咁，坦誠相對就得。」
唔鍾意靚仔
女神的擇偶條件原來好簡單，不用高富帥也能成為裙下之臣，「我自己都賺到錢，所以唔需要對方識得賺錢，而男仔太過靚仔我會有少少驚，我忍受唔到男仔一日24小時不停咁照鏡，如果對方成日出去玩，都會令我冇安全感，而有才華嘅男仔最吸引我，最重要錫我同屋企人，心靈上要溝通到，性格最好要開心、幽默啲。」
苟姑娘同好友李亞男、鍾嘉欣、王君馨、岑麗香組成的「處女黨」，黨員紛紛退黨嫁人，現只剩下她一人，問到33歲的苟姑娘是否心急嫁人？「爹哋媽咪都關心嘅，我覺得唔使太心急，因為婚姻係一生一世，要好小心選擇，搵錯人點算呀！」
減肥要調節心態
苟芸慧在患上甲狀腺病時，有傳體重失控暴脹至170磅，病癒後她成功收身，除了行山和做運動減磅，也要改變自己心態，她說：「減肥都要調節心態，始終心態會影響身體，盡量令自己思想要正面開心啲，約朋友一齊出去食嘢，傾心事減壓，再調理吓身體，加上運動，同埋少食多餐，每一餐都盡量少油，例如食烚菜，我覺得塊面最難減，永遠都係圓圓哋，都唔知可以有乜方法可以令塊面再瘦啲？」
更多精采時尚內容，盡在 http://add.appledaily.com 。