特首選戰月底提名期結束後，就知邊隻馬仔入唔到閘率先被OUT。政界普遍預計，前財政司司長曾俊華入閘冇問題，皆因民主派肯過票嘅話，一定夠飛撐佢落場，同獲左派同西環撐嘅前政務司司長林鄭月娥打真軍。
免嚇怕建制選委
而為免民主派「造王」撐薯片叔嘅感覺太強烈，帶嚟反效果，有民主派話選委會將提名分散畀薯片叔同退休法官胡國興，皆大歡喜之時，避免薯片叔獨有「黃」袍加身味，嚇怕建制選委。
八方之前都講過，曾營會攞民主派淺黃選委提名，但深黃嘅就要三思。而嚟到選戰中段，攞民主派提名已經唔成問題，反而要關注嘅係同建制選委嘅提名比例，原來唔少建制選委都表達過，如果薯片叔叔嘅提名係「偏黃乏藍」，左派一定追住嚟打，標籤佢係民主派參選人，建制選委或因此敬而遠之，所以黃、藍票必須均勻啲，免畀人口實。
與此同時，民主派選委都好窩心，佢哋都計過度過，覺得如果只係冧晒啲提名畀薯片叔，或會令人覺得佢係民主派推舉嘅參選人，屆時變相係為林鄭助選，所以必須策略性分散投資，喺咁嘅情況下，胡官肯肯定係受惠者，相信部份民主派選委會畀提名胡官，至少打住「促進競爭」嘅招牌向建制參選人送提名，都會畀人感覺大方得體啲。
相比民主派同西環嘅造王行動，唔知大家覺得邊個陣營高招啲？八方則聽聞，薯粉對民主派分票策略都好滿意，仲話參選人要攞不同陣營人士嘅票，有部份民主派支持，反而係賣點，更加要支持，聽落撐曾確實理所當然。
至於一早話明想參選嘅長毛，查實有民主派都話，如果夠票嘅話，何不分啲畀佢？咁先至真正皆大歡喜！
李八方