快活谷賽事，一向對內檔馬較有利，翻查紀錄，原來近13次谷草賽事，皆有一檔馬勝出，合共取得21場頭馬之多。咁今戰邊啲黃金一檔馬值得重視呢？
最值得留意應係第五場四班1200米之「聖驛善」，此駒過去四次抽得一檔跑谷草獲兩WIN成績，老馬今次難得再執到一檔，加上鞍上人蔡明紹已守齋九次賽事冇馬贏，收入大減，必心急求突破，當然會把握機會求勝。
此外，第七場三班1200米之灰馬「光芒再現」，有三大有利因素，一是排一檔，此駒以往兩次排一檔非冠即亞；二是本身五次角逐三班賽，取得三冠一亞一殿佳績，今次落番三班佔優；三是由沙田回師最首本四捷之谷草1200米，勢將重現其旋風式後勁。