香港體壇男神逐一發威！繼羽毛球一哥伍家朗喺年廿九升至個人世界排名新高嘅第八位後，噚日年初五輪到乒球一哥黃鎮廷，佢喺最新公佈嘅世界排名，由原本第七升至香港男單歷史新高嘅第六位！今日放完年假復操嘅鎮廷，話希望五月德國世錦賽攞到越多獎牌越好！
25歲嘅黃鎮廷由年三十晚放到噚日，佢話為咗今年一連串大賽，農曆年都唔敢食得太放肆，好似佢最鍾意嘅角仔，每日限制自己食兩隻咁大把，對於獲得歷史新高嘅世界排名，佢話：「能夠成為香港第一個男單達到世界排名第六，都好值得開心，但𠵱個排名我會平常心睇，知道係因為張繼科里奧後幾個月無打，排名無咗，我先升上第六。」世界排頭五位順序係中國馬龍、樊振東、許昕、日本水谷隼同德國奧哈洛夫。
黃鎮廷舊年圓夢參加人生第一次奧運會，更喺10月德國世界盃歷史為香港奪得男單銅牌，但喺佢心中最想達成嘅願望係五月嘅世界錦標賽，佢話：「上一屆（2015年）我攞到混雙季軍，希望今屆攞到更多獎牌，甚至殺入決賽。」港隊總教練陳江華大讚黃鎮廷外，更寄語徒弟加強前三板嘅威力同再加多啲自信，更高嘅世界排名指日可待。前香港男單代表盧傳淞曾於1985-87年間上過世界排名第七位。