人稱樂壇長毛嘅周博賢，近年涉足政界，先後參選立法會同選委會，但都攻破唔到建制壟斷功能組別嘅局面。原來今屆立法會有位議員係佢書友仔，工業界吳永嘉（Jimmy，圖）同傳媒聚會時透露，周博賢係佢港大法律系嘅同學仔，仲笑稱創作歌曲應該早過對方㖭！
Jimmy咁講，皆因佢音樂造詣好高，鋼琴達演奏級，十幾歲已經參加大型比賽；大學一年級時喺校內音樂比賽自彈自唱，試過俾當時任評判嘅寶麗金高層睇中，叫佢去試音，但最後佢冇揀音樂呢條路。
作為工業界代表，佢對於政府取消強積金對沖嘅政策梗係睇到實，透露早前就此同梁特及政務司司長張建宗等官員會面，同近60個商會組成嘅香港各界商會聯席會議聚頭，商討對策，提出反建議方案。