新正頭最緊要意頭兼熱鬧，最啱就係舞獅助興嘞，噚日係雞年首個交易日，雖然畀特朗普行政命令一搞，大市唔可以紅盤高開，但中銀香港（2388）新春團拜就完全無受影響，總行3樓大堂就氣氛一流，今年適逢係佢哋慶祝在港開業100年，醒獅隊採青時，就特意吐出「百年中銀．與您同行」嘅行慶標語旗幟，認真識攝位！
話明係管理層向員工團拜，當然由舵手岳毅主持。新年唔想學做葉劉，就要好似岳總裁醒目點睛後就好閃開，舞完獅先嚟張大合照。
中銀呢隊醒獅隊，原來不假外求，由該行員工組成，成立至今已有廿載，專業程度足以應外間機構邀請，友情客串表演，可謂名副其實嘅銀行界夏國璋（本港著名龍獅團）。
醒獅雖然熱鬧，不過噚日員工開工利是依然得200元，未見配合百年行慶加料，希望下半年進入慶典高𥧌期時，行方唔好令員工失望啦！