某居士合指一算，得出被麒麟撞一撞衰足三年的結論，信與不信話之你，本來無傷大雅姑妄聽之，誰不知崩口人忌崩口碗，去年春節曾經和神獸有親密接觸的政客聽見立即黑面，就像嫌人緣還不夠壞似的，兜口兜面回敬一句「我諗佢應該留意吓呢個『選舉（舞弊及非法行為）條例』，如果喺選舉期間有人發言影響咗選舉結果，可能係犯法」。師奶發火同大家開年，第二個驚唔驚不得而知，最中意發表占卜心得的馮君肯定嚇到鼻哥窿冇肉，準備正式擺檔普渡善男信女的司徒發姣恐怕逼於無奈縮紗。自從十日前特朗普登基，法西斯已經成為最新敏感詞，知機者即使生性如何專橫霸道，在這種非常時期都不得不小心講嘢，以免禍從口出駟馬難追，遭好事之徒貼上不體面的標籤，和秦始皇希特拉墨索里尼列在同一陣線；競選特首既然已被睇低一線，好心就收吓口啦，何必又再落下發爛渣把柄，至怕好嘅唔靈醜嘅靈，果然被高人批中，到時除了通街獲得「嗱嗱嗱，一早話咗㗎啦」的恥笑，還間接替人打造金漆招牌，真係有你咁傻冇你咁天真。
何況係咁意衰三年，今時今日都算執到，先不提閒閒哋打爛塊鏡傳統上都要衰七年，麒麟君的碰撞可說十分優惠，你睇吓可憐的美國人，除非不測之風雲吹正白宮，第四十五任總統提早收檔，一衰起碼衰四年呀，萬一那班唔知死的擁躉繼續搖旗吶喊，做完第一屆成功連任，仲要衰夠八年㖭㗎。不過你說我樂觀又好悲觀又好，我相當有把握衰八年的噩夢不會成為事實，因為照咁玩法，這個世界不會捱得咁耐。