雞年首度同大家見面，八方先祝大家萬事如意，處處見綠燈，冇票投就食多啲花生！而雞年其中一件政壇喜事，非公民黨楊岳橋AY封盤莫屬，料年底做老襯。
AY自稱百無禁忌
今年年方36嘅岳少都係屬雞，即係犯太歲喎！但岳少就同八方講，結婚係開心事，冇人怕嘅，總之就百無禁忌。唔知喺結婚前使唔使同傳聞中嘅女友陳玉娥，嚟個一刀兩斷呢？
雖則岳少自己百無禁忌，但佢話為咗安老人家嘅心，所以都會搵師傅擇番個吉日，正如細個嗰時，佢都會為咗安媽媽嘅心而去攝太歲。至於大婚嘅具體日子，真係未定好，預計都係今年年尾啦！
而岳少噚日到港台為節目《議事論事》錄影時，鄉議局選委、上水鄉委會主席侯志強一見到佢，第一個問題就係問佢，結咗婚未？原來侯志強係想派利是畀岳少，岳少當然笑晒口咁話未啦，侯志強即刻畀咗封利是岳少，兩人仲一齊影咗張相㖭。
而喺岳少離場後，侯志強仲問記者，遲吓同岳少結婚嗰位，係咪去年參選新界東嘅娥姐陳玉娥？嘩，侯志強真係識得講笑咯，但八方相信岳少嘅真正另一半陳小姐，都唔會介意嘅。反而侯志強似乎對娥姐念念不忘，佢話自從立法會選舉後，就冇再見過娥姐咯，唔知娥姐𠵱家點呢？估唔到侯志強都識得欣賞娥姐喎，遲吓岳少正式變成人夫後，娥姐唔知會唔會考慮改投侯志強嘅懷抱呢？
李八方