政治取向與投資有時可以分得好開！講緊係美國股神畢菲特，佢一向支持希拉莉做美國總統，但舊年11月狂人特朗普當選美國總統後，佢冇嬲豬，反而大力買入股票，旗下投資旗艦巴郡在大選後買入120億美元（約936億港元）嘅股票，不過佢就拒絕透露掃咗咩貨。
畢菲特一直認為，無論邊個做美國總統，佢對長遠美國經濟前景依然有信心，估唔到佢身體力行。佢最近接受彭博訪問，自爆大選後掃入股票，不過佢點都唔講買咗乜，被問到有冇買航空股，佢只係話巴郡截至舊年9月底係揸住航空股。
股神粉絲一直大惑不解，股神明明於2008年睇淡航空業，近年又走去買入多隻航空股，佢又冇詳細說明之喎，確係令人費解。
不過，特朗普上周五頒佈行政命令，停止美國接收難民並禁止伊朗、伊拉克等七個伊斯蘭國家公民入境，市場開始擔心未來有更多航線限制，或對航空公司構成影響。而特朗普嘅狂人本色亦開始令投資者擔心，拖累美股回軟。