年初三赤口西環兩位馬仔葉劉同林鄭前後腳去中聯辦鐵票票倉漁農界拜票，新春期間見到呢棚人都眼冤，話晒香港乃國際金融中心，但漁農界選委竟然多達60人，仲多過金融界，無他，這班政治食客乃共產黨控制香港特首選舉的「出市代表」，猶如政治keeper，老細叫佢東就東、西就西，何來自由意志。會面內容更超級低能，林鄭提到自己是家庭主婦，很喜歡煮餸，很愛吃活雞，所以至今都不肯買「雪雞」，希望未來喜歡新鮮食物的市民可以有選擇。傳媒又轉述林鄭稱自己拿不起家中的煮食鑊：「我自己都係主婦，屋企爐頭太大，我唔夠力拿起個鑊，但真係好鍾意煮餸。」請問同選舉有何干？
林鄭乃西環干預選舉得益者，才以689式語言偽術表示「睇唔到、冇證據」，但始終唔敢講：「冇咁事」。今次西環介入選舉更猖狂，成個陣營當正曾俊華係敵我矛盾咁打，令人心寒，政通人和？講笑。今日選舉將會種下香港更大分裂的禍根，泛民、專業界及官僚體系會支持林鄭嗎？呢隻鑊林鄭月娥一人之力當然孭唔起，因為佢自己都只不過係「高級出市代表」。曾鈺成早前公開表示，各參選人要對梁振英幾年來施政表態，林鄭一直掩掩映映，就係唔想得罪兩人背後共同老細。問題係香港政客一日唔敢公開否定梁振英以鬥爭為綱的路線，否定梁粉用人唯親，一日就唔可能有和解，矛盾就只會積累下去。
如果林鄭早已被欽點，應該就扮晒溫和中立，好似當年煲呔一樣，有自己選舉工程，盡可能唔俾西環及深紅政客埋身，好明顯目前欽點未完成西環先要搏命造勢，意圖製造三高特首，即高民望硂高提名票及高得票。但禍兮福所倚、福兮禍所伏，製造三高特首只會進一步挑釁香港人，一定涉及政治交易、施壓、暴力拉票。當日煲呔雖然已經欽點，但就同袋巾電視辯論，比泛民糟質、恥笑，令香港人對欽點消消氣，輸辯論就贏民心。林鄭身段高，自稱公務員表現一直英明神武，好鬥好辯，又點會認低威。本來提名票攞二百票已夠晒，比入閘百五票多些少，一來以示公平競爭，二來顯示謙虛，唔好咁寸咁盡。但林鄭背後勢力要交數，又怕投暗票難操控，於是層層加碼，力求提名票過半，將暗票制度夾硬扭曲為明票制，唔再理會香港人政治觀感，種下香港日後政治大敗局。
外界好多人認為林鄭對政策有認識，當政綱一出就能敗部復活，民望超越薯片叔，其實又係得啖笑。大家試想想林鄭連漁農界選委達60席應否檢討都唔敢表態，反而葉劉比她更有Guts，當林鄭受制於背後一大棚政治利益集團及董式假大空建議，又如何能夠體現新政府有一套新價值呢？政治上受西環控制，政策上延續梁施政，人事上接收梁粉核心如陳茂波、張志剛。改朝就要換代，本應洗牌重來，將政治負債撇清，可惜在共產黨式醬缸政治文化下，奶媽表面上「升呢」，但原來不過是一個小媳婦，擺脫不了背後眾多公公婆婆。
小家嫂當然不是王熙鳳，連打踭勾腳，將放棄全民退保屈落去薯片叔，都做得低手過人。
添馬男