原來近年有公屋園圃，用咗由房屋委員會研發、毋須使用食水嘅「零灌溉系統」，唔單止建設同埋管理成本低於傳統嘅系統，仲可以收集雨水循環再用，減少雨水流入排水系統。
呢個系統嘅原理係利用雨水灌溉，落雨時泥土吸收雨水，多出嘅雨水就流入園圃地下嘅特製儲水箱，表層泥土嘅水份乾涸後，儲水箱收集嘅雨水，就會經毛細管作用向上輸導，形成自給自足嘅循環灌溉植物。
2013年房委會就喺屯門龍逸邨建設咗面積約50平方米嘅「零灌溉系統」園圃，兩年試驗期間，毋須以人手澆水灌溉，每年慳番54.75立方米食水，而且植物生長狀況良好，園圃冇出現澇水或發出異味。
房委會都話系統試驗結果令人鼓舞，證明有效節約用水同減少保養所需嘅人力資源，會更廣泛應用喺合適嘅新園圃。