新年𢭃利是，收到幾錢最開心？相信答案都係「多多益善」啦，但如果有日收到一毫子利是，會唔會即刻大叫「大吉利是」？
有讀者向八方報料，指大年初二喺觀塘月華街一帶，收到當區議員建制派徐海山嘅利是（圖）。議員派利是，例牌都係朱古力金幣加上寫有祝福字句嘅紅紙等，徐海山都唔例外，利是內有一個朱古力金幣同一張印有佢姓名同電話嘅「福」字，點知睇真啲，原來內有乾坤，仲有一個較細嘅利是封，打開一睇，竟然係一個一毫子，讀者話覺得唔派好過派，派嗰一毫子嚟把鬼？
翻查資料，派一毫子利是嘅年代，可能要追溯至五十年代喇。八方問過徐海山，佢話呢封利是係有「玄機」，因為呢啲一毫子係喺慈航會開過光，可以保平安，笑言利是封上都印有慈航會個名，可能街坊無為意，之前大約已經派咗1,000封咯！