民主黨單仲偕（單雞）噚日同太太孖住同傳媒拜年，仲即場示範使用佢新買嘅唱K神器，一去到佢屋企就聽到Simon & Garfunkel嘅名曲《Sound of Silence》。咦，特首參選人曾俊華都好鍾意呢首歌，單雞播得呢首歌，唔通有弦外之音？
咁民主黨又確實好似撐薯片叔多啲嘅！佢亦徇眾要求高歌一曲，老實講，歌喉就麻麻哋，但單太聽到好冧，已經夠晒啦。
除咗唱歌之外，單雞突然摷番張聖誕卡畀八方睇，上面仲寫住「患難見真情」。八方心諗：乜料呀？聖誕節寫啲咁嘅嘢。單雞開估話，張卡係前全國政協委員劉夢熊寫畀佢㗎！嘩，尖啤真係好有心喎。
單雞仲提醒八方，2月27號就係尖啤回復自由身嘅日子，而當時就係特首選戰如火如荼之際，睇嚟到時一定有好多花生食！