新特蘭打緊護級戰，傷兵一大籮，領隊莫耶斯靠佢同愛華頓嘅關係，班咗白賴仁奧維度同吉遜兩名舊將返嚟幫手。「黑貓」水深火熱，又出唔起錢，都難為「莫天才」碌盡人情卡，佢上任後簽咗好多前曼聯同愛華頓球員返嚟，淨係呢班舊將加埋，都差唔多砌到隊波出嚟。
連掃奧維度同吉遜
新特蘭喺禮拜一宣佈，由愛華頓簽入白賴仁奧維度同吉遜，據報轉會費加埋750萬鎊（約7,300萬港元）。莫耶斯喺2012年仲做緊愛華頓領隊嗰陣，已經簽過佢哋兩個一次，事隔五年，莫天才再搵佢哋過檔，呢次就係嚟新特蘭幫手，其中哥斯達黎加國腳奧維度今年26歲，份約去到2020年。莫天才話：「我嗰陣喺愛華頓簽佢返嚟，諗住佢做左閘巴尼斯嘅替補，但因為巴尼斯實在太強，佢一直上唔到位。」新特蘭啱啱將入球能力好強嘅左閘雲安賀特以1,400萬鎊賣畀水晶宮，相信奧維度嚟到會即刻有正選。
至於29歲嘅吉遜踢防中，係曼聯青訓出身，之後應莫耶斯邀請轉會愛華頓，但近兩季冇咗莫天才睇住，吉遜喺「拖肥糖」不受重用。因為吉遜狀態成疑，所以新特蘭只係畀咗份年半嘅合約佢。莫耶斯話：「吉遜嘅傳球可以加強我哋實力，同埋我好欣賞佢嘅後上入球能力。」莫耶斯喺冬季轉會窗總共班咗三個舊將，除咗吉遜同奧維度外，上月中請咗自由身嘅尼史葛返嚟。尼史葛家陣已經34歲，以前踢愛華頓都跟過莫帥搵食。
冇錢擴軍焗搵舊部
自從莫耶斯接手新特蘭後，用盡佢嘅人情牌，喺愛華頓同曼聯度班兵，夏天轉會窗已經喺紅魔收購咗麥尼亞同當奴路夫，再借到由佢提拔嘅贊奴沙；同時佢搵埋踢過愛華頓嘅派拿同安尼捷比返嚟。連埋一直踢緊嘅奧沙同埋魯迪維爾，莫耶斯嘅新特蘭真係差個龍，就可以砌到個「魔糖聯軍」出嚟。莫耶斯其實都幾無奈，球會又唔肯拎錢出嚟買人，就算賣咗雲安賀特賺千幾萬鎊，都只係拎幾百萬鎊出嚟。莫天才，今次真係辛苦晒！