黎姿（GiGi）08年嫁商人馬廷強，跟住生咗三個囡囡，孖女馬家蔚（Pricia）同馬家鎂（Gianna）轉眼已6歲，細女Pegella就4歲。GiGi婚後好低調，甚少帶囡囡出席公開場合，向來好重視家庭嘅佢，即使忙於照顧家庭，但都好關心因車禍受重傷嘅細佬黎嬰，仲特登喺07年棄影從商，接手黎嬰創立嘅醫學美容公司，喺十年努力下，早前成功上市，GiGi一日之內身家更暴升近6億元。
啱啱榮升做上市公司主席兼行政總裁嘅GiGi，前晚大年初二約父母同細佬黎嬰去尖沙嘴半島酒店睇煙花開年。GiGi噚日凌晨喺微博貼咗兩張相，除咗有佢着住紅色連身裙，以煙花做背景嘅單人相，仲有同爹哋、媽咪、黎嬰嘅合照，全家福好溫馨，但相中未見GiGi老公同三個囡囡。
願家人健康
GiGi仲留言送祝福，她說：：「可與我最愛的家人平安健康一起過年，就是每一年的願望，在這裏我衷心祝福我愛的親人、好友、粉絲們，新的一年萬事如意，身體健康，幸福美滿！」GiGi仲笑到四萬咁口。
撰文：馮仁昭
