根據馬後炮大師屈指一算，屬鼠嘅舒韋恩史迪加（小豬）喺猴年 愛情得意，但事業全線冚檔，但一到雞年就會轉運，事業返晒嚟。喺年初二嘅英足盃，小豬事隔一年有多再幫曼聯踢正選，有入球又有助攻，幫球隊主場4:0大炒韋根，打入16強。
上次小豬幫曼聯踢正選仲係羊年嘅事，之後成個猴年唔係受傷，就係坐冷板，直至到雞年嘅年初二，終於打番正選。44分鐘，小豬右路傳中，助攻費蘭尼頭槌入波，幫曼聯開紀錄。下半場，曼聯嘅基斯史摩寧同米希達利恩各入一球，到81分鐘，小豬整個倒掛金勾埋齋（圖），紅魔贏夠4:0完場，強勢晉級第五圈。
摩佬：唔會俾佢離隊
小豬事隔超過一年幫曼聯上陣，仲射入超過400日以嚟首個球會入波，仲搭多球助攻，賽後當選埋今場最佳球員。小豬嘅慶祝動作都好搶鏡，扮打網球，唔通向費達拿致敬？當然唔係啦，係多謝前網球手老婆伊娃諾域嘅支持。領隊摩連奴賽後話小豬唔會離隊，下半季仲會派佢踢歐霸盃㖭！另外，非聯賽球隊瑟頓聯就以1:0淘汰咗列斯聯，加埋林肯城，今屆英足盃首次有兩支非聯賽球隊打入16強。
