打籃球一向都係有身體接觸嘅運動，但係打到好似澳洲NBL呢場聯賽咁激，就真係未聽過。
話說一位效力新西蘭破碎機，叫米曹嘅球員喺同對方搶籃板果陣中招，對方球員嘅手意外插中米曹隻左眼，同一般嘅插眼整到人好痛同睇唔到嘢唔同，今次嘅意外直頭令到米曹嘅左眼凸咗出嚟。最恐怖係電視直播鏡頭都影到呢個畫面，好在導演夠醒目，做得好小心，之後無再重播。場波因為呢單意外暫停咗15分鐘，米曹之後喺隊醫嘅攙扶下離場。更加神奇嘅係，雖然呢單意外咁恐怖，但係報道話米曹嘅左眼並無受到永久性嘅傷害，球隊嘅總經理接受訪問果陣，仲話米曹可以坐喺度，而且受傷嘅左眼仲睇到嘢，傷勢無當初預期咁嚴重，咁都算係不幸中之大幸！