【本報訊】不少樓市專家都講明今年樓價先跌後升，不過，堪輿學家柏天心就認為會先升後跌，並特別指出，有鐵路效應的港島南區，反而是雞年樓價表現最停滯不前的地段，業主們要守一守。
柏師傅解釋，五黃和二黑是風水中最兇的兩個煞星，前者今年去到南面，後者今年到西北面，令到港島南及屯門兩區，今年是最運滯的地方。柏師傅直言港島南是「重災區」，最好避之則吉，即使南港島線通車，「都幫唔到咩手」，該區業主不要期望雞年有得賺，要守一守，之後會好。
由於南面屬火，玄空飛星為「九紫」，要到九運期間，即2024年至2043年，就會如魚得水、最當旺，故這區為未來長遠最好投資的地區。
樓盤名宜有木有水
講完差的地段，好的地段又在哪呢？柏師傅話，今年首選的是東面，八白財星來到東面，甚旺東區的樓盤，特別是九龍東，包括觀塘及將軍澳，都是置業的好地方，甚至是位處堆填區的日出康城，都有得發圍，買樓置業不妨考慮一下。
其次是東南位，因為有九紫，筲箕灣及西灣河港島東區一帶都會唔錯。六白飛星到了北位，亦有利北面發展，包括元朗及上水，但運勢稍稍不及九龍東及港島東區。
至於咩名的樓盤最好，柏師傅就話，名字有木有水的樓盤都不錯，因為東南位屬木，北位屬水，所以盤名有此兩字旁會比較有優勢，新世界（017）荃灣的柏傲灣就中晒兩大條件。
對於雞年樓價表現，柏師傅指，只有第一季在丁酉屬火、火暖土帶動下，所以有得升，其後都無甚利好因素帶動，地產市道平平，甚至倒跌。