近年有唔少運動員都鍾意喺社交網站玩直播，同班粉絲拉近距離，而喺一月一日嫁畀中華台北乒乓球手江宏傑嘅福原愛都唔例外！呢位28歲嘅日本乒乓球女將就趁大年初一，着起紅色衫向球迷拜年，當時都有10.4萬人睇直播㗎。福原愛自從里約奧運之後就冇參加過比賽，佢早前仲透露自己生完小朋友先會復出，令唔少人都懷疑佢已經有咗；有粉絲就趁福原愛直播時問佢係咪大咗肚，不過「瓷娃娃」就扮聽唔到。
另一個喺初一拜年嘅中國羽毛球代表林丹，早前被拍到趁太太謝杏芳臨盤，同小三趙雅淇喺酒店幽會，事發後當事人向家人道歉，最終獲太太原諒。林丹初一將一家三口合照上載互聯網同球迷拜年，不過就被網民話係做戲，想清洗賤男污名喎。