雞兔賽跑，本命年的奶媽雞，趁今日赤口，乘機冷嘲熱諷：「兔大叔，我早着先雞，你無可能贏。連龜都贏你七條街，都怪你過去一直hea做，活該。」
兔大叔應節，馬上回嘴反擊：「一雞死一雞鳴，你只係糯米雞2.0，竟然半夜周街搵廁紙，真弱雞。」
奶媽雞：「我死雞可以撐飯蓋，你就等住兔死狐悲，泛民唔敢埋身，想拎夠百五票入閘，咪使旨意。」
「別以為喺西環menu上的白斬雞就想金雞獨立，你跟我一樣都係港英餘孽，只是一碟賣五十蚊的油雞滷味雙拼飯，西環老細食完算，唔會感召，只會反胃。」
「兔大叔，你妒忌吧。除了西環吹雞，我還有上帝留位，任命無難度。」
「神近年絕不手軟，每年都會大肆殺雞，瘟雞和癲雞，搞到市民雞毛鴨血，一殼眼淚，你無雞會㗎啦。」
「狡兔有三窟，你躲在窟裏離地太久了。話你知，大雞焉食小米，我決心做一隻有為雞、明火雞！即是火鳳凰咁解！政總個雞籠係我地盤，唔會預你！」