港隊兩名滑浪風帆代表鄭俊樑同陳晞文，周六喺美國邁阿密舉行嘅滑浪風帆世界盃，分別出戰男、女子RS:X板獎牌賽。鄭俊樑以第六名衝線，最終總成績位列第九位，比日前嘅第10位微升一位；至於曾喺首日排過榜首嘅晞文就以第八名衝線，最終以總成績第七名完成。港隊喺冬季集訓同新年後首場世界賽事，就有兩位港將取得頭10名嘅成績，絕對係雞年一個好開始！