梁烈唯年三十晚榮升爸爸，昨早他去到養和醫院探望太太駱保雯（Tina）和囡囡Karina，中午離開獨自外出去吃飯，唯唯接受訪問時說：「囡囡嘅中文名留待堪輿師傅改，𠵱家太太可以享用醫院安排嘅餐單菜式，初四出院之後就返屋企由岳母煮。」
問到有否幫手餵奶，唯唯說：「有幫手抱埋去，原來餵母乳唔係咁易，我個女好好笑，喊時個嘴郁吓郁吓，擺埋去吸咗一啖或者兩啖就即刻瞓覺，係咁叫佢都唔醒，老婆話似我瞓得，我瞓覺火燭都唔識走，好似我食得瞓得，𠵱家都識笑。」胡定欣、袁偉豪及陳敏之昨日亦有到醫院探唯唯女兒，抱過BB的定欣說：「BB個樣好似唯唯，個嘴好似佢向上。」另外，譚詠麟昨傍晚6時再到醫院探華仔，逗留約半小時便離開。
採訪：張俊銘
攝影：葉君海
