從當打嘅奧斯卡杜斯山度士到步入生涯暮年嘅泰維斯都相繼前往中超掘金，似乎中超對南美精英嚟講真係「老少咸宜」嘅淘金樂園。不過，仍然有好多球員睇重榮譽多過金錢，好似利物浦中場菲臘比古天奴日前接受英國《每日郵報》專訪，表示從來冇諗過要去中超：「中國，No。我冇興趣，一刻都冇諗過。」啱啱以15萬鎊周薪同利記續約五年嘅古仔仲話，希望追上杜格利殊、魯殊、漢臣、桑拿士、蘇亞雷斯同謝拉特等紅軍名將嘅成就：「我想追逐錦標，五年新約給予我呢個機會。」
另外，哥倫比亞射手法卡奧今季返番法甲摩納哥後重生，15場聯賽射入12球之餘，球隊亦暫時排榜首，難怪「老虎」講明推中超offer呢家嘢好重要，所以要講三次：「我講咗三次No。推卻呢啲報價其實唔容易，但我想同摩納哥並肩作戰贏冠軍，並證明自己回復100%水準。」