港足總教頭金判坤入場睇波就唔出奇，可能噚日正值大年初一，佢帶埋囡囡同笑容滿面嘅太太入場；對於嚟自佢家鄉南韓嘅FC首爾輸波，Kim sir就唔回應，不過有球迷要合照，佢都冇托手踭。
花 絮︰傑志套裝新春賣大包
今次賀歲盃傑志主場，當然唔少得擺檔賣紀念品，特別推出「丁酉年賀歲盃」紀念頸巾（$70）同紀念錦旗（$39），如果買滿傑志衫褲滿500蚊就可免費獲贈其中一樣。
花 絮︰泰妹、阿豬媽齊捧場
噚日天氣麻麻，大球場時有微絲細雨，但無阻南韓同泰國球迷入場撐自己人，好似南韓代表有一家大細帶住南韓國旗入場；泰妹就帶住蒙通聯旗入場。
花 絮︰財神吉祥物鬥搶鏡
農曆新年點少得財神？賀歲盃大會安排咗一個高大嘅財神派糖，吸引唔少球迷埋身攞糖，不過傑志吉祥物「傑仔」都唔弱，有駐場嘅實Q都忍唔住攞起手機影相。
