有時真係唔到你唔信，跑賀歲馬都幾講意頭，仲記得2012年大年初三（25日）沙田賀歲賽事中，喺第五場就正正跑出一匹叫為「恭喜發財」嘅馬匹，幾咁符合節日嘅氣氛。
到今年大年初三（30日），將會出戰沙田賀歲馬嘅好意頭馬仔當然都有唔少，而其中角逐第七場三班1400米並季內四戰未甩過位置嘅「運財童子」，可以講得上既吉祥又跑得。
呢匹馬嘅練馬師蔡約翰已經近13次沙田日賽，贏足12日，當中7日仲要贏兩場或以上，喺排行榜已經牢牢咁企喺第一名，拋離亞軍大摩六場之多，明顯呢個馬房已經上晒力，充滿贏馬能量。
其次，上仗「運財童子」於莫雷拉胯下首次增程至1400米，可惜直路持續內閃，最終以頭位之差飲恨跑第二，今仗繼續由雷神操刀，只要直路擺正堂軚，呢個童子睇怕都幾難唔運財俾馬迷？