【本報訊】親子遊學團騙案的7天韓國團行程豐富，除有穿韓服、做泡菜體驗，更有冰上釣魚等活動，但5個涉事家庭的團費竟是超筍價，一家三口最平1萬至1.95萬元不等，有業界人士指新春出發的韓國團，最平每人7,000元，一家三口至少要2.1萬元，籲市民小心選擇。
業界籲勿貪平
涉事的遊學團海報標價雖為1.8萬元，但姓徐女搞手以「有參加者突然棄團而多出名額」為由，涉誘騙家長報名。另一苦主Joey指，其小朋友年僅兩歲，對方亦落足嘴頭，「我話得兩歲點參加，佢就話冇問題，可以體驗吓，最後仲話一萬蚊可以包晒我哋兩大一小，又話價錢係機票錢同改名手續費」。
東瀛遊執行董事禤國全稱，遊學團一直受家長歡迎，東南亞以日本、台灣、新加坡、北京及上海均較熱門，而近年韓風盛行，亦令韓國遊學團吸引力大增，「除咗想去遊覽，仲希望有藝術同文化交流」。不過禤提醒家長不要貪平報團，及要審慎查看主辦機構背景，「特別係節日假期出發嘅遊學團，一定唔會平，以年初二出發為例，最平去韓國嘅五天團，都要七至八千」。
■記者龔蕙芝