農曆新年一到，着紅色底衫褲似乎是指定動作，玄學家麥玲玲指，此做法源於以前犯太歲者，多數會在褲頭綑一條紅頭帶，作為化解，而傳統上鮮艷顏色搶旺、代表喜慶吉祥，久而久之，演變成着紅色底褲以至底衫可帶來運氣，尤其是賭運，而整體上只要鮮色便可，例如橙、綠、紫都可以。她特別指出，今年是雞年，雞食穀米為主，想旺偏財，可將一些米放入利是內，袋住去賭，獲取橫財機會有望進一步提高。
不過，她提醒不是任何人都可着到成身紅色去增加旺氣，一些「忌火」的人，即農曆4、5、6月出生人士，「火」太旺，再著紅底褲、成身紅色，過猶不及，並不適宜；相反，冬天出生、晚上出生的人士，就需要多一些「火」。
至於農曆新年有何禁忌，她指傳統上很多事也不可做，不可買鞋、不可洗頭、不可結婚搬屋，但時代不同了，禁忌越來越少，「以前啲人剪頭髮係大事，長頭髮嘅人多，大年初一洗完頭披頭散髮咁，唔好睇，總之都係意頭嘢，新年流流，個人齊整清潔就得」。她又指，今年家居的財位在單位的正東方，可擺放有水又有大葉的年花有助催旺財星。