每逢農曆新年，紅姑總要到車公廟求籤，今年亦不例外。這次她不單求自身，更向車公叩問特首選情。她向來力撐梁振英連任，及至梁宣布棄選，便轉而支持林鄭。難道紅姑是愛西環人士？當然不，她的理由別開生面：她相信林鄭當選，梁班子一眾甩皮甩骨的精英，什麼吳得掂、垃圾桶、囤地波，甚至白宮發炎人，統統能在天堂留位，順利過渡，到時醜聞笑話一籮籮，我的專欄便不愁沒題材了。
知我者，莫若紅姑也。萬一薯片叔叔當上特首，選賢與能，欣欣向榮，報紙社論的點擊勢必暴跌，而專欄作家的題材亦肯定銳減，想想也不寒而慄。立即追問紅姑，名副其實的「天庭消息人士」到底怎麼說。
紅姑從手袋掏出一張黃色紙條，遞給我說：「我問林鄭月娥選情，求到呢支。」
那是第三十六籤，屬中籤：「問君曾見舊時無：一醉昏迷誰為扶？正是今朝新樣出，無錢空手又來沽。」
我說：「劉皇發二零零七年為香港求籤，就係呢支。不過我哋解籤前，要改正啲錯別字先。車公籤好多時都抄錯字，唔止呢支。望吓第三句，『正是今朝新樣出』，『新樣』即係新款，但咩新款呢？同前文後理完全無關。『樣』字應該係『釀』字，『新釀』係新酒，對應到上句嘅『醉』同下句嘅『沽』，抄錄嘅人可能因為同音而搞錯咗。『沽』意思係買，唔係賣，《論語》話『沽酒市脯不食』，『沽酒』即買返嚟嘅酒。好嘞，你解通呢幾個字，成支籤嘅意思就好清楚。車公係同你講：你望吓舊時發生咩事啦，飲醉咗之後，冇人會嚟扶你㗎啦，就算今日有新酒出，你都已經冇晒錢，仲想買？」
紅姑想一想，有點失望地說：「舊時嗰個，即係梁振英，依家已經無人扶佢。新酒，即係指新特首？林鄭想去買，但冇錢，吓，咁佢咪輸硬？」
我安慰她：「舊年我都回顧過車公呢幾年嘅預測表現，結論係：唔算好準，命中率只係比財經演員高少少。呢支籤表面上同西環放嘅風相反，我覺得可以用嚟同西環做對沖，暫時信住先。不過你都唔使咁絕望：香港上次求到呢支第三十六籤，恒指升破三萬點，創歷史新高，醉咗一年，到二零零八年先爆煲。車公呢個預測，似乎有另一種解讀，可以話林鄭今年選到，畀勝利沖昏頭腦，然後搞到一鑊泡。」
紅姑接着問：「其實《易經》靈啲，抑或車公靈啲呢？」
我答：「紅姑，你太年輕了，根本兩樣都唔靈。宋朝有個術數高手儲泳，有本書叫《祛疑說》，入面討論過廟宇靈唔靈嘅問題，大意係話：一座廟靈唔靈，同入面個神像無關，而係睇佢有冇人氣。儲泳話土木無靈，只係人心有靈，如果好多人拜一座廟，人心精爽就會依附嗰度，咁座廟自然就靈。《易經》都係同樣原理，準唔準係睇人。」
紅姑又問：「你之前用《易經》占過梁振英同葉劉，話梁振英連任失敗，已經中咗，話葉劉係陪跑，似乎都好可能中，咁林鄭同薯片，你又有冇卜過？」
我說：「有。十二月梁振英話唔連任，我即刻幫兩個人占咗一次，今個月我又占多兩次。三次夠啦，唔會再占。」
「結果係咩？點解要占三次呢？」
「結果……天機嚟㗎喎。占三次，係因為我自己都唔係好信。好，今日就講林鄭嘅結果畀你聽。上個月第一次占，得履卦，冇變卦，卦辭係：『履虎尾，不咥人，亨。』佢踩到老虎尾，但老虎冇咬佢，亨通。點解老虎唔咬佢呢？卦意係話佢小心翼翼，如履薄冰，所以冇事。問題係：老虎指邊個呢？指習近平，同指梁振英，結局會好唔同。『履虎尾』，即係話跟住老虎行，咁林鄭好明顯係跟住梁振英行，而梁振英冇咬佢，所以林鄭依家咪有運行囉。但呢支卦係咪代表佢選到特首呢？『履』係鞋，居於人下，支卦不過話佢跟住人行，冇咩凶險，睇唔到可以升級。今個月再占兩次，一次喺林鄭宣布參選之後，一次喺今朝，好神奇，兩次占卦居然一模一樣，都係《乾》變《坤》。《乾》卦剛健，有君王之象，代表佢目前嘅情況；有趣嘅係，佢結果係《坤》，同《履》一樣，亦有跟住主人走嘅意思。《坤》嘅卦辭仲有一句：『西南得朋，東北喪朋。』似乎話林鄭喺西環有朋友，北方冇朋友噃。《乾》變《坤》，我第一眼直覺係：天變地。唔通由天堂打落地獄？」
紅姑聞言，連呼上帝保佑。