一，大雞大利年初一，記得送禮送薯片兼送埋廁紙。
二，恭喜發財，千祈咪行近西環。事關小明大師押重注落廁紙，隨時輸凸，或者屙凸。
三，雖然應景，但唔好幻想今年有雞鮑翅食。即是說就算開發到5%郊野公園，都會被中資搶貴晒地，將來年輕人連麵包都未必食得起。
四，今年最旺的，肯定是小學雞。TSA可以變種，小學雞被迫埋暗角，只能擲功課還擊。以工作紙襲警，罪成喎，幾弱雞哩。
五，雞年等北京吹雞的人，已經等到神經衰弱，騰晒雞，醫院必須做好應變方案。噢，乜醫管局高層同樣發雞瘟唔知投邊個好咩？sorry咯。
六，上帝鍾意白切雞抑或鹽焗雞？唔撐雞，等於唔撐中央咁話！食客無say，今日去飲茶開年的市民，攞定籌，等知客喊你，一聲「有枱」，就係真·感召。
七，雞唔識入閘，籠裏雞會作反。美國那隻當奴雞示範如何「衝習」、「落習」（落佢面），香港點樣自保？扮發雞盲唔掂。to run吧，走地雞，有運行。