被喻為最勤力練馬師的沈集成，年卅晚當然如常工作，佢除咗睇馬督操外，還主力捉住何澤堯、郭能兩位騎師喺機坪傾個不停，可以話有晒搏殺手影。
初三沙田賀歲賽，沈集成同何澤堯獨合作第一場五班1200米草地之「魔幻神駿」，此駒暫時陣上表現欠佳，但今仗一來評分減到新低，二來除眼罩除脷帶上陣，三來抽正1檔，三大變數下，難怪沈集成賽前亦緊張起來，要同何澤堯研究妥當搏殺大計先安樂。
至於郭能，初三將為沈集成第五場四班1200米草地的「追風追月」操刀，今朝兩人雞啄唔斷傾，顯然對此馬今仗寄予厚望。「追風追月」大前仗三班同程1200米放入亞軍，嗰場若非直路上走勢稚嫩，在催策下外閃，可能已經贏咗，反映此馬在三班亦足以取勝，今仗初落四班仲要排1檔，睇怕郭能實食無黐牙咯！