今日新年年初一，謹向讀者拜年，願大家在雞年「雞鳴即起，灑掃庭除」。朱子治家格言係講「黎明即起」，改兩隻字，反映雞年將至啫，請唔好以為左丁山背錯書。點解係將至呢，因為二月三日立春之後，先至正式係雞年吖嘛，照足曆法嚟講，今日仍然係辛丑月呀。至於灑掃庭除，今天香港人絕大多數住在高樓，家內無庭除（天井也）咁奢侈咯，亦都難以聽見晨早公雞啼叫，現代化一啲，朱子格言內兩句大概可改動為「黎明即起，晨運徐來」（慢慢嚟做，長者更加不要急）。
既是雞年，祝大家身壯力健，四季平安，聲音壯如晨曦雄雞，做事永不偷雞，煩惱事打到埋嚟唔會騰雞，計劃深思熟慮絕非小學雞，財不露眼搵銀靜雞雞，在公眾場合唔好高聲吵鬧做吹銀雞，更加要態度和善拒絕霸王雞，炒股睇馬靜候機會唔好走雞，家和萬事興，大家餐餐食炸子雞。
雞年世事難預測，美國出咗一位總統叫做特朗普，其人橫行霸道似倀雞，見到傳媒唱衰就㷫過辣雞，把口不饒人似鐵嘴雞，無時無刻不搵交嗌，非美國之福，也亦容易鬧出禍，釀成世界紛爭，呢位總統就職後第二日就去探訪CIA總部，猛咁向情報人員擦鞋，唔記得自己半個月前仲鬧過情報機關似納粹，在CIA講話15分鐘，提及情報局只有8至9分鐘，其餘時間就用嚟鬧傳媒，尤其是CNN，指記者係地球上最不誠實的人類（journalists are the most dishonest human beings on earth），駛唔駛咁激呀？歷史上冇一位美國總統俾傳媒鬧佢鬧得咁緊要，佢以眼還眼，亦係第一位不停大罵傳媒嘅總統。唔好以為總統大晒，傳媒難攖其鋒（例如土耳其總統可以一聲令下就封殺媒體），美國傳媒有憲法保護，有民意基礎，挑戰總統係唔會停止嘅，離任嘅奧巴馬臨別贈言就叫記者唔好做擦鞋仔，要堅持以批判態度，促使民選官員盡責。特朗普一開始就視CNN及媒體為仇人，以後四年必定會發生不少挖醜聞嘅專題報導，令美國永無寧日。橫睇掂睇美國已不再是United States而係低分裂之國，經濟會否受政治拖累？現時好難講，冇人知，穩陣起見，大家在雞年不宜投資股票債券更不宜或在樓市積累太多投資，慎防黑浪一個唔該打埋嚟，便被困愁城。