曾經係亞姐冠軍、做過「仁美清叙」主席、有美滿婚姻、育有3個囝囝，仲係城中名媛，羅霖絕對有一段幸福嘅歲月。
不過，羅霖同前夫劉坤銘喺12年分居，去到14年先達成庭外和解，3個仔跟羅霖生活，不過冇贍養費，俾咗劉坤銘嘅私己錢都攞唔番，令羅霖要努力工作養家。
成熟嘅女人有佢嘅韻味，單身嘅羅霖除咗有陪伴多年嘅J君之外，一直被指多追求者埋身。好似喺12年中，羅霖就被指同11年亞洲先生季軍林睿過從甚密，又替對方出面搵邀請出活動，甚至主動聯絡亞視等等。
去到15年，羅霖又被指有逾百億身家、有「拉鏈大王」之稱嘅熊宏海支持，甚至斥資搞百萬生日會。而羅霖當時已經否認係包養，又話生日會只係用咗10萬，使費都係由影迷會同自己包底。
上年底，羅霖又先後被影到同男士出街，先喺11月被發現羅霖同一位叫阿寺嘅猛男着情侶裝出席鍾麗緹北京婚禮，再喺12月被雜誌影到羅霖帶埋大仔，約咗一位外籍男士喺半島食燭光晚餐。最近佢返大陸拍廣告，仲同23歲小鮮肉戰天澤熊抱，唔知會唔會成為羅霖嘅新追求者呢？