女見習騎師嘉琦BB蔣嘉琦出道以來，呢兩年唔單止受馬迷歡迎，就連馬會都好鍾意呢位萬人迷，不時搵佢做生招牌幫手推廣賽馬。
之前馬會招聘新見習學員，嘉琦BB以師姐身份撐場，開季嗰陣馬會又搵佢參加分享會，而佢自己亦周不時應馬主或練馬師之邀出席飯局聯誼。
明日大年初一（28日）花車巡遊呢項大型賀歲活動，馬會都搵咗嘉琦BB同香港馬術隊成員梁巧羚做主角，同各位市民拜年，全因嘉琦BB又騎得、又睇得，天生甜美可人，一眾男子漢騎師唔恨得咁多！
講番今次花車巡遊，除咗睇架車坐咗咩人外，架花車本身當然亦係主角。馬會話今次運用咗中國傳統的鏤空藝術，融匯現代LED燈，呈現出古今融和、光影交錯的多角度觀賞效果，而花車上面仲整咗隻金光閃爍的駿馬雕塑，寓意繼續貢獻社會與香港人共創美好未來。
一句到尾，如果一眾琦粉想近距離同嘉琦BB打個招呼，甚至捕捉機會同佢合照，就唔好唔記得明日去尖沙嘴趁吓熱鬧啦！