過新年！好多人話為咗紅運當頭，都會搵條「紅底橫」充喜；會唔會真係好運啲？呢一點無從考究。不過如果你都係傳統人，愛在喜慶節日多一點紅，今次可以考慮換一部紅色手機。
日本水貨手機，剛剛在年廿八晚，新返了一批紅色手機，由深紅到淺粉紅共有7隻不同顏色，而且最重要是價錢唔貴，由千零到三千頭都買到。
潮人之選一定係Kyocera INFOBAR（$2,880），機身由日本設計名師深澤直人設計，須知佢曾經為無印良品，設計過超經典簡約的「壁掛式CD播放器」；至於呢部INFOBAR，都是以簡約為主調，機身按鍵仲玩一格格不同顏色，加上 INFOBAR出過多代，只有這一部香港先用到，鍾情玩潮款的可考慮。
另一平價之選，是Sharp 007SH（$1,080），這是現時市場上罕見，行Android系統的日本摺機，只是「拍拍聲」的開合手感，已令不少老機迷愛不惜手。
Sharp SHV33（$3,080），是市場上比較少見的高階規格細機，機身屏幕只有4.7吋，加埋幼邊框設計，所以機身只有126 x 66 x 8.9mm、重120g，但硬件規格不算太差，行SnapDragon 808配3GB RAM。
不過講到實用精選，一定是HTC 10（$2,880）；因為到今天好多人仍然認為佢係性價比之王！硬件規格行S810八核心（2.2GHz雙核 + 1.6GHz雙核）處理器，配4GB RAM、32GB ROM，可加microSD卡；行貨價長期高企四千左右，現在水貨機首試$2,880低價位，而且還要有市場上一直缺貨的紅色，感覺相當應節。
如果你喜歡粗獷格調，可考慮Kyocera G01（$2,980），單就佢對應美國軍標MIL-STD-810G，能做到防水、防塵、耐衝撃、耐振動、耐日射、防濕、温度耐久（高温/低温）’低壓對應及鹽水耐久呢幾點，絕對係喜歡戶外活動人士最愛；不過肥通就膚淺一點，就是喜歡機面的屏幕指南針App，帶點點G-Shock及PRO TREK手錶的味道。
喜愛細機款的，還有一部Sharp SHV32（$2,780）；屏幕使用了 SHARP 自家靚芒－－5吋IGZO（全高清），但硬件規格尚算不俗，行Snapdragon 810處理器，配3GB RAM、32GB ROM，以細款機來說已算有交代，最愛的還是它的淡粉紅色，不會太浮誇。
最後一部是Kyocera V02（$1,980），機身硬件只是一般，行1.4GHz Qualcomm MSM8928 四核心處理器，配2GB RAM、16 GB ROM，屏幕亦只有5吋（1280 x 720），不過最大賣點是它機身超薄，只有8.2mm，而且還是Made in Japan的，據稱這是不少西裝客的最愛。
查詢：三禾電氣（旺角亞皆老街83號先達廣場1樓F33）
記者、攝影：朱崇德
